كالعادة

إهداء من الرااائعة سلوى

لسه .. بحب النيل

مش هاستنى
لما النيل يعجز
و يسهر معايا ع القهوة
يلاعبني طاولة
و ف آخر السهرة
يدبسني ف المشاريب ... ويخلع
ويسبني اروح لوحدي
بعد ما يسرق روحي مع آخر قشاط
أداري خجلي من كشافات النور
و اصالح الأسفلت
ماليش مزاج النهاردة

أعدي على حافط بتاع اللّب

ولا اغوص ف قلب الشارع
- حلمين هناك ... مستنيين
يختين صغار ...
من مينا روحي بيخرجوا
حلمين هناك ..
و انا هنالك مربوط ف خوفي ووحدتي
( ملعون أبو النيل )
إيه اللي خلاني حبيته كده ؟
وحوّلني نورس
و انا اللي باكره الطيران

- من فوق حدود الشوف
بتشدني الذاكرة
لشريط سينما بيبتدي من أول التواريخ
من قبل اسكندر الأكبر
إسكندرية
.....
يتثبت المشهد شوية ..
تحدفني بصّة على البحر الحزين
ملايين سنين ..
وهو بيحارب طواحين الهوا
و انا آخري ايه ؟

قاعد ف أول كراسي الصالة باتفرج
باحلم بـ " ماسك "

ألبسه شوية لحد ما ازهق
أنا مين ف دول ؟؟

أنا ليا دور ف العرض ده ؟؟
طب هل ف يوم ... ؟؟
- " شطبنا خلاص .. "
تقتلني الكلمة ..
تتكسر جناحات النورس
- مين قال ان انا عاوز لبّ
- ولاّ باحب الطاولة ..
أنا باكره حتى القهوة

مشكلتي ..
إن انا ..
لسه باحب .. النيل

كالعادة

كالعادة

بتتخانق مع أحلامك

تتنرفز منها

فتقوم ...

وتصحي الشمس

وتبلّم قدام قمصان مش بتطيق ريحتك

تحتك خوف ...

على وشك ملل الدنيا

تتزق ف قلب قميص ..

وتشيل رجليك ع الشارع

مش نفس الشارع

ولا نفس العواميد
ولا نفس الضحكة ف نفس وشوش الناس

هل كل حاجة بره مني .. اتغيرت ؟؟؟!!!!!

ولا أنا

ما بقيتش نفس الولد ؟؟؟

نقوش على جدار الوطن

نقوش على جدار الوطن

( 1 )

أنا قلبي أخد فرمان
وهايواجهك
وده حفظاً .. لماء وجهك
ماهش عيبة يدور الوقت وتعجز
لكين العيبة .. ع القشاية تتعكز
و اشوف تلميذ على الأستاذ بيتأستذ
و كل العيب
تسيب القِبلة و الوجهة
و يمة بيتهم الأبيض
تقيم وجهك

( 2 )

على راحتك
تنام .. تصحى
تروح .. تيجي
تمدّ له أو تشيل راحتك
على راحتك
لكن حاسب يزيد كيفك
لـَيومها تنقلب راحتك
ويومها تنقلب راحتك
على راحتك

(3)

لا هو قريب
ولا ابن عم
ولا نسيب
ولا بينّا دم ّ
طب قولولي و وضحولي
يمكن افهم
ليه شيلنا " سام " ؟؟
و سيبنا كلمة " ابن عم " ؟؟!!

( 4 )
ومين حَبك.. ومين ملّك ؟؟
ومين فاتِك.. ومين مال لِك ؟؟
ومين باعك ؟؟ ومين ملّك ؟
و مين ف الدنيا يا أمي
بيكبرلك
ومين بيخاف من اولادك
ينام
لانتي يطول ليلك
وما تلاقي لنفسك توب يصون عَرضك
ومين يفرح ف يوم حزنك
ومين يفرح ف يوم فرحك
ومين بينام على ضِلك

( 5 )

ومين فينا بيرهب مين
ومين قلبه حمام ابيض
و مين قلبه غراب البين
و مين قلبه .. ما بين وبين
سألنا .. رجعنا و ضحكنا
بنسأل مادام عارفين
و نسكت ليه مادام شايفين
و ليه الرد ع الحاصل
ده حاصل ضربنا قسمة
ومكتوبة
بقالها سنين


( 6 )

و كلام
مغزول على نول مجدول بالوهم
و مين يهتم
إيه يعني الطفل يموت
ما يلاقي ضريح غير حضن الأم
إيه يعني البنت تشبّ
و ما تلقاش إيد البستاني
اللي بيقطف رمان الحلم
وميـ.....ن ... يهـ .. تـم ..

( 7 )

وكلام
مدهون بحكاوي الليل
إذ يغشى
و الخوف .. إذ يطغى
و الجبن الساكن جوّا قلوب الناس
إذ يتجلى
و كلام
عن آخر واد
لسه ما راودتهوش البنت
عن أحلامه
عن آخر فتافيت الحلم

ما تغربيش

استني حبة

ما تغربيش

لسه باقيلي ف آخر الحواديت مكان

مش عاوز ابقى شهريار

ولا سندباد

ولا حتى عاوزك شهرزاد

أنا عاوزك انتي زي ما انتي

تسمعيني ... ما تحكيليش

احكيليك ايه ؟؟

احكيليك ايه ؟؟

كان فيه زمان صياد قلوب

رافض جميع الممكنات
عايش ف قمقمه الحزين

بيغني غنوته للريح

" رافض أكون .. تكرار لقيس

أو حتى ورد

رافض تكوني العامرية بحبها لذاتها

رافض أكون روميو الغبي .

و تكوني جوليت

اللي لازم ف النهاية أموت ف حضنك

رافض أكون أيوب جديد

ف عصر ما بيعرفش صبر

رافض أكون مسجون ف حبي
وتكوني و"لاّدة" ألم

رافض أكون آخر نهار يشرق على ليل قرطبة "

ويقطع الغنوة الحزينة

" بيز جيتار "

من بين عيونك ألف شمس بيشرقوا

اتشدّ بره قمقمي

رافض أكون ... تكرار

لـ ...(قلبي دليل )
رافض أكون روميو الـ ....
- طب هات إيديك

رافض أكون أيوب ...

- ما تخافش من وجع الغرام

رافض أكون مسجون

- اكسر حدود قمقمك

أخاف لتكوني ولاّدة

- ما تخافش من قلبي البسيط

خايف يكون آخر نهار

- أنا النهار .. مد الإيدين

و المشكلة
إيد سندباد
دبلانه من مليون ربيع

ف ما مدهاش

و اما ملت م الهروب

وعينيها آلت للغروب

قام خاف قوي

من غير عينيها ازاي يعيش

من غير هواها ازاي يعيش

قام جري حاضن طرفها

وقالها

ما تغربيش

بنت صح .. جاية ف الزمن الغلط

بنت صح .. ف الزمن الغلط

قتلها الاشتياق ؟

ولا الهوى بقى مسالم قوي ؟؟

حاسة بغربة ع الآخر مع إن بينكم يا دوب مسافة بوح

- بتحبها قوي ؟؟

طيب خلاص ما تقول

مشلول على طرف اللسان ليه الكلام؟؟

شادد لجام فرس القصايد من سنين

فارد خطاك للريح

إيه اللي غيرك كده

قلق القصايد ؟

ولا انشغال روحك ؟؟

ولا برائتهم ؟؟؟

- البنت الصح .... الجاية ف الزمن الغلط

- و الولد اللي ضحكته شبه الملايكة

إزاي تقف وقفة حداد

قدام شقاوة طفل زيّه

بيرجعك من تاني لطفولة كان نفسك تعيشها

ارسم بإيدك على خده

الضحكة اللي اتحرمت منها

وهاتله لعبة ...

كانت شداك ف زحمة التخفيضات

دخّله جواك قوي

واتهجى روحه

- حلمين يا دوب ..

لكنهم راسمين حدودك

أجمل الأدوار ف عرضك المرتجل

كوميدي ساعات

تراجيديا روحك ... خط واضح فيه

و الدراما ... كلمتين

بتحبها ...

بتحبها .. ف بتوهبك سر الوجود

تنساب حدودك ع المدى

- من قلق روحك ... تخرج جيوش الأسئلة

تنكتب .. آخر قصيدة ف عرضك المرتجل

وف عز نشوة ( سوكسيهات ) المعجبين

تنسى سؤال

- خارج حدود النص -

هل يا ترى ..

هاتشد تاني لجام فرس القصايد ؟؟

ولا خلاص ...

اكتفى ..

بفارس ...

غيرك ؟؟؟؟؟؟